غزل - ۳۹

پھر ہوا وقت کہ ہو بال کشا موجِ شرابدے بطِ مے کو دل و دست شنا موجِ شراب

پوچھ مت وجہِ سیہ مستیٴ اربابِ چمنسایہٴ تاک میں ہوتی ہے ہوا موجِ شراب

جو ہوا غرقہٴ مے بختِ رسا رکھتا ہےسر سے گزرے پہ بھی ہے بالِ ہما موجِ شر اب

ہے یہ برسات وہ موسم کہ عجب کیا ہے اگرموجِ ہستی کو کرے فیضِ ہوا موجِ شراب

چار موج اٹھتی ہے طوفانِ طرب سے ہر سوموجِ گل، موجِ شفق، موجِ صبا، موجِ شراب

جس قدر روحِ نباتی ہے جگر تشنہٴ نازدے ہے تسکیں بہ دم آبِ بقا موجِ شراب

بسکہ دوڑے ہے رگِ تاک میں خوں ہو ہو کرشہپرِ رنگ سے ہے بال کشا موجِ شراب

موجہٴ گل سے چراغاں ہے گزر گاہِ خیالہے تصور میں زبس جلوہ نما موجِ شراب

نشے کے پردے میں ہے محوِ تماشائے دماغبسکہ رکھتی ہے سرِ نشو و نما موجِ شراب

ایک عالم پہ ہیں طوفانیٴ کیفیتِ فصلموجہٴ سبزہٴ نوخیز سے تا موجِ شراب

شرحِ ہنگامہٴ ہستی ہے، زہے موسمِ گل!رہبر قطرہ بہ دریا ہے، خوشا موجِ شراب

ہوش اڑتے ہیں مرے جلوہٴ گل د یکھ، اسدپھر ہوا وقت کہ ہو بال کشا موجِ شراب